Datganiad I'r Wasg
Cynnydd yn y Gwaith o Estyn Canolfan Gelfyddydau Pontardawe
Mae'r erthygl hon yn fwy na 12 mis oed
Efallai na fydd lluniau ar gael ar gyfer erthyglau dros flwydd oed
24 Hydref 2024
Mae cynnydd sylweddol yn digwydd i’r prosiect ymestyn a diweddaru sylweddol yng Nghanolfan Gelfyddydau Pontardawe, gyda’r gwaith adeiladu wedi hen ddechrau. Mae’r prosiect, a ddechreuodd yn gynt eleni, yn trawsnewid y ganolfan yn lleoliad modern ar gyfer y celfyddydau ac adloniant, gyda sinema newydd â lle i 70 eistedd ynddi.
Nod y diweddariad hwn yw dod â llu o welliannau i’r lleoliad lleol poblogaidd, gan gynnwys caffi a bar ar eu newydd wedd, ailgynllunio’r swyddfa docynnau, a sawl gwelliant i olwg y lle. Ar ôl i’r gwaith orffen, bydd y sinema newydd yn galluogi’r Ganolfan Gelfyddydau i ddangos ffilmiau mawr diweddaraf Hollywood – rhywbeth na fu’n bosib cyn hyn.
Mae’r prosiect, sy’n cael ei ariannu gan grant o £600,000 gan Gyngor Celfyddydau Cymru, £250,000 o raglen Trawsnewid Trefi Llywodraeth Cymru, a chyfraniadau ychwanegol o raglen Cyfalaf Cyngor Castell-nedd Port Talbot a Llywodraeth y DU, yn rhan allweddol o ymrwymiad y cyngor i fuddsoddi mewn diwylliant ac adfywio lleol.
Dengys lluniau o’r safle fod cynnydd sylweddol wedi digwydd, gyda strwythur y sinema’n dechrau ffurfio. Y tu mewn i’r ganolfan, mae’r newidiadau i’r caffi a’r bar ymhell ar y gweill, gan addo creu amgylchedd newydd a chroesawgar i ymwelwyr ar ôl iddo agor.
Meddai’r Cynghorydd Cen Phillips, Aelod Cabinet Cyngor Castell-nedd Port Talbot dros Natur, Twristiaeth a Llesiant: ‘Mae’n wych gweld datblygiad Canolfan Gelfyddydau Pontardawe’n symud ymlaen cystal. Bydd y cyfleusterau newydd hyn nid yn unig yn rhoi hwb i’r cynnig diwylliannol yn yr ardal, ond bydd hefyd yn cyfrannu at adfywio canol tref Pontardawe. Rydyn ni’n parhau i fod wedi ymrwymo i ddarparu cyfleoedd diwylliannol a hamdden o safon i’n cymunedau.”
Mae’r prosiect hefyd yn unol â Strategaeth Ddiwylliant uchelgeisiol y cyngor, sy’n tynnu sylw at ymroddiad y cyngor i fuddsoddi mewn diwylliant i hybu twf economaidd a llesiant cymunedol.
Disgwylir i’r gwaith adeiladu barhau dros y misoedd i ddod, gyda’r ganolfan yn parhau i fod ar agor drwy gydol i broses.
