Datganiad I'r Wasg

Mae’r amcanion llesiant mentrus hyn yn rhan o Gynllun Corfforaethol Cyngor Castell-nedd Port Talbot 2024-2027 dan y teitl Gweithio tuag at NPT mwy ffyniannus, tecach a gwyrddach.

Nawr, dywedwyd wrth Aelodau Cabinet y cyngor, yn eu cyfarfod ddydd Mercher, Rhagfyr 11, 2024, mewn adroddiad cynnydd hanner-blynyddol ar y Cynllun Corfforaethol (Ebrill – Medi 2024), fod pedwar o’r amcanion ar y trywydd cywir.

Mae uchafbwyntiau’r amcanion yn cynnwys:

Pob plentyn yn cael y dechrau gorau mewn bywyd

• Gall 1,252 o blant gael mynediad i’r Cynnig Gofal Plant i Gymru yn NPT.
• Mae 208 yn ychwanegol o blant dwy flwydd oed wedi cael mynediad i ofal plant a ariennir gan Dechrau’n Deg, gyda 69 o’r llefydd hyn yn cael eu cynnig drwy elfen ymestynnol y rhaglen.
• Mae’r nifer o eithriadau parhaol ar draws ysgolion NPT wedi disgyn dros y ddwy flynedd ddiwethaf.
• Prosiect Ymadawyr Gofal – amlygwyd cartref i ymadawyr gofal i’w cefnogi ac i’w helpu i symud ymlaen i fyw’n annibynnol.

Pob cymuned yn ffynnu ac yn gynaliadwy

• O raglen gyfalaf gwerth £4.247m, clustnodwyd £1.5m ar gyfer menter ‘Glanhau a Glasu’ – nawr wedi’i chyflawni i bob pwrpas. Prynwyd cerbydau ysgubo, gwnaed gwelliannau i feysydd chwarae, a gwnaed gwaith ar ffensys a llwybrau mewn parciau, ynghyd â gwaith ychwanegol i gynnal a chadw coed, gwella arosfannau bws, gwelliannau i doiledau cyhoeddus a sefydlu maes chwarae antur ar Lan Môr Aberafan.
• Mae gwaith ar droed i ddarparu Strategaeth Adfywio a Datblygu Economaidd holistig ar draws NPT, i adlewyrchu’r amodau economaidd presennol a’r cyfleoedd fel Cronfa Bontio TATA, y Porthladd Rhydd Celtaidd a’i ran mewn cyflenwi Gwynt Arnofiol oddi ar yr Arfordir (FLOW) a allai greu miloedd o swyddi gwyrdd newydd.

Gall ein hamgylchedd, diwylliant a threftadaeth leol gael eu mwynhau gan genedlaethau’r dyfodol

• Mae gwaith yn parhau ar brosiect aml-filiynau-o-bunnoedd Parc Gwledig Gnoll, ), a bydd grant sylweddol o Gronfa Dreftadaeth y Loteri Genedlaethol yn cael ei ddefnyddio i gynnal safle hanesyddol Castell Margam.
• Ers mis Ebrill 2024, mae’r Tîm Cefn Gwlad a Bywyd Gwyllt wedi rheoli dros 35 safle natur a 67 safle Cyfeillgar i Wenyn law yn llaw â’r Tîm Gofal Stryd.

Mae gan bobl leol sgiliau a gallant gael mynediad i swyddi gwyrdd o safon uchel

• Y Porthladd Rhydd Celtaidd – Mae’r Achos Busnes Llawn (FBC) bellach wedi’i gymeradwyo gan y Llywodraeth, ac ar ôl cyhoeddi ‘safleoedd treth’ sy’n rhoi cymhellion ariannol i fuddsoddwyr sefydlu ym mharth y porthladd rhydd, mae’r prosiect bellach ‘ar agor i fusnes’.
• Bargen Ddinesig Bae Abertawe – mae prosiectau Cefnogi Arloesi a Thwf Carbon Isel a Chartrefi fel Pwerdai sy’n cael eu harwain gan NPT ar y trywydd cywir i gael eu cyflenwi. Mae Cartrefi fel Pwerdai’n mynd y tu hwnt i’r manteision a fodelwyd i’w cyflenwi ar y cam hwn ar hyn o bryd.

Dywedodd Arweinydd Cyngor Castell-nedd Port Talbot, y Cynghorydd Steve Hunt: “Mae Castell-nedd Port Talbot a’i dinasyddion yn wynebu heriau sylweddol, yn enwedig o gofio am y swyddi a gollir yn Tata Steel UK, ond mae cyfleoedd sylweddol ar gael hefyd, a rhaid i’r cyngor fod yn hy, yn uchelgeisiol ac yn hyderus.

“Amlinellir ein huchelgais a’n gweledigaeth ar gyfer dyfodol Castell-nedd Port Talbot fel lle iachach, cyfoethocach i fyw ynddo yn y Cynllun Corfforaethol, ac rydyn ni wrth ein bodd o weld fod cynnydd da’n digwydd ar ein hamcanion.”