Datganiad I'r Wasg

Mae Cyngor Castell-nedd Port Talbot wedi penodi’r arbenigwyr adeiladu Morgan Sindall Construction fel prif gontractwyr y prosiect, gyda’r nod o adfywio canol y dref a gwella cyfleusterau allweddol.

Pwyntiau allweddol:

• Nid yw’r Ganolfan Ddinesig ei hunan yn rhan o’r prosiect adfywio, felly bydd mynediad ar gael i’n cwsmeriaid drwy gydol cyfnod gwneud y gwaith.
• Disgwylir y bydd mwy o sŵn o ganlyniad i’r gwaith adeiladu.
• Bydd parcio cyhoeddus yn dal i’w gael ym ‘maes parcio uchaf’ y ganolfan ddinesig, cyn y bariwns 

Amcan y prosiect adfywio, a ariennir gan Lywodraeth y DU, yw adnewyddu a moderneiddio lleoliad 798 sedd Theatr y Dywysoges Frenhinol drwy wella profiad y cwsmer gyda chaffis newydd, estyniad i dalcen de-orllewinol yr adeilad, gwedd newydd i ardal weini’r bar, a mynedfa i’r awditoriwm gyda chyntedd mawr, modern. 

Ymysg ychwanegiadau eraill bydd cyfleusterau cynadledda gwell, ailfodelu pwll cerddorfa brafiach, gwell sain a golau, ynghyd â gwelliannau technegol a gynlluniwyd er mwyn gallu cynnal ystod ehangach o gynyrchiadau yn y theatr boblogaidd.   

Hefyd bydd Sgwâr Dinesig Port Talbot yn trawsnewid i fod yn lle cymunedol amlbwrpas gyda nodweddion fel seddi newydd a llecynnau glas a fydd yn cael eu gwella’n sylweddol gyda llawer iawn o blannu coed a llwyni.

Bydd y gwaith ‘glasu’ i’r Sgwâr Dinesig yn golygu cynnydd o 70% mewn coed a bydd yr ardal hefyd yn elwa o ‘erddi glaw’ – mannau glas a gynlluniwyd yn benodol i ddal ac amsugno dŵr glaw sy’n rhedeg oddi ar y tir a’r adeiladau.

Dywedodd Aelod Cabinet Cyngor Castell-nedd Port Talbot dros Strydlun, y Cyngh Scott Jones: “Rydyn ni’n gwerthfawrogi cydweithrediad ac amynedd pobl wrth i ni ddechrau’r gwaith o wella a thrawsnewid ardal canol tref Port Talbot. 

“Rydyn ni eisiau i’n preswylwyr a’n cwsmeriaid gael yr holl wybodaeth am fynediad i’n cyfleusterau allweddol, ac unrhyw darfu posib, yn ystod cyfnod gwneud y gwaith, felly cadwch lygad am bostiadau ar y cyfryngau cymdeithasol a chyhoeddiadau eraill gan y cyngor.”