Datganiad I'r Wasg
Prosiect i Leddfu Pwysau gan Ymwelwyr mewn pentref yng Ngwlad y Sgydau i ddechrau yn ystod yr haf eleni
Mae'r erthygl hon yn fwy na 12 mis oed
Efallai na fydd lluniau ar gael ar gyfer erthyglau dros flwydd oed
20 Mai 2025
Mae prosiect i greu cyfleusterau newydd i leddfu’r pwysau mae ymwelwyr yn ei greu ym Mhontneddfechan, sy’n rhan o Wlad y Sgydau syfrdanol o hardd, yn dechrau ym mis Mehefin eleni.
Dyma uchafbwyntiau allweddol y prosiect:
- Darparu ateb parhaol i’r broblem barcio: gwell rheolaeth o effeithiau ymwelwyr ar Bontneddfechan.
- Gwell Toiledau Cyhoeddus: cyfleusterau newydd a gwell i bawb.
- Siop Fferm / Gymunedol: Cefnogi busnesau lleol a’r gymuned.
- Llety Gwyliau i Ymwelwyr ar raddfa fach: dewisiadau cyffyrddus ar gyfer arhosiad pleserus i deuluoedd ac unigolion
- Diogelwch y Ffyrdd a Thirlunio: Gwella’r parth cyhoeddus i greu amgylchedd mwy diogel a phleserus.
- Parc Chwarae: Creu lle hwyliog a diogel ble gall plant chwarae.
Mae Gwlad y Sgydau yn ardal o fwy na dwsin o raeadrau rhwng Pontneddfechan ac Ystradfellte yn rhan dde-orllewinol o Barc Cenedlaethol Bannau Brycheiniog. Bydd yr ardal yn gweld torfeydd o ymwelwyr bob blwyddyn, sy’n cael effaith negyddol ar y gymuned leol o ran parcio anghyfreithlon ac anaddas, a diffyg cyfleusterau addas.
Lleolir Pontneddfechan yn agos at Sgwd Gwladys, ble bydd llawer o bobl yn ymweld.
Dywedodd y Cynghorydd Cen Phillips, Aelod Cabinet Cyngor Castell-nedd Port Talbot dros Natur, Twristiaeth a Llesiant: "Cynlluniwyd y prosiect hwn i greu datrysiad parcio parhaol i’r ardal, sydd wedi bod yn adnabyddus am ddioddef problemau difrifol gyda thrafnidiaeth yn ystod misoedd prysur yr haf, ac i ddarparu cyfleusterau y bydd ymwelwyr a’r gymuned leol yn gallu’u defnyddio.
“Er mai ein nod fydd tarfu cyn lleied â phosib yn lleol, bydd angen cyfyngu ar leoedd parcio ar hyd Heol Pontneddfechan o bryd i’w gilydd yn ystod cyfnod y gwaith adeiladu. Mae busnesau yn yr ardal yn cael gwybod yn uniongyrchol am hyn er mwyn sicrhau fod y cyfathrebu’n rhugl."
Dywedodd y Cynghorydd Jeremy Hurley, Aelod Cabinet Cyngor Castell-nedd Port Talbot dros Dwf Economaidd a Newid Hinsawdd:
“Mae’r prosiect hwn yn gam pwysig tuag at reoli gwasgfeydd a grëir gan ymwelwyr mewn modd sy’n cefnogi’r gymuned leol ac yn gwarchod yr amgylchedd. Mae’n adlewyrchu ein hymrwymiad i isadeiledd cynaliadwy sy’n gweithio er budd pawb.”
I gael mwy o wybodaeth am y prosiect hwn, ewch i: https://www.npt.gov.uk/cy/busnes/adfywio/gwlad-y-sgydau-pontneddfechan-buddsoddiad-mewn-seilwaith-ymwelwyr
Ariennir y prosiect hwn gan Lywodraeth y DU.
