Datganiad I'r Wasg

Mae Ryan wedi dechrau ar gwrs MSc mewn Deallusrwydd Artiffisial ym Mhrifysgol De Cymru, ac mae'r cyllid yn cyfrannu at dalu ffioedd dysgu a phrynu offer hanfodol a deunyddiau astudio—gan gynnwys cyfrifiadur newydd a gwerslyfrau.

Bu'n gweithio fel peiriannydd yn labordai Tata am bron i 10 mlynedd, ac mae'n arbenigo mewn data mwynau. Erbyn hyn, mae Ryan yn defnyddio ei arbenigedd dadansoddol i ddatrys heriau cemegol a pheirianegol cymhleth gan ddefnyddio deallusrwydd artiffisial a dysgu peirianyddol. Mae wedi cael dechrau cadarn i'w daith academaidd yn barod, gan ennill rhagoriaeth yn ei ddau aseiniad cyntaf.

Mae newidiadau diweddar i'r Gronfa Cyflogaeth a Sgiliau, a sefydlwyd i gefnogi unrhyw unigolion yng Nghymru y cafodd eu swyddi eu dileu oherwydd newidiadau yn Tata Steel UK, yn golygu bod y cyllid ar gael i bobl nad oeddent yn gymwys o'r blaen. 

Ymhlith y rhain mae cyn-weithwyr sydd mewn rôl newydd nad yw'n adlewyrchu eu set sgiliau neu'n cyfateb i'w lefelau incwm blaenorol, fel pobl ar gontractau dim oriau neu gontractau dros do a phobl sy'n gweithio am yr isafswm cyflog. 

Hefyd, mae cymorth bellach ar gael i bobl sydd mewn gwaith ond y mae angen iddynt gael hyfforddiant ychwanegol er mwyn cyflawni eu rôl neu gamu ymlaen yn eu gyrfa, ac i bobl sy'n datblygu eu busnesau eu hunain ond nad ydynt yn gweithio amser llawn eto.

Wrth sôn am y ffordd mae'r cyllid wedi'i helpu, dywedodd Ryan: “Mae'r Gronfa Cyflogaeth a Sgiliau wedi rhoi gobaith i mi drawsnewid sefyllfa heriol yn gyfle i newid fy ngyrfa. Mae tîm Cyflogadwyedd CnPT wedi bod yn gymaint o gymorth i mi a byddwn i'n annog unrhyw un arall yn yr un sefyllfa â fi i gysylltu â nhw i weld sut y gallan nhw eich cefnogi chi.”

Dywedodd y Cyngh. Jeremy Hurley, sef yr Aelod Cabinet dros Newid Hinsawdd a Thwf Economaidd: “Mae'r meini prawf cymhwysedd ar eu newydd wedd yn golygu y gall y Gronfa Cyflogaeth a Sgiliau helpu mwy fyth o bobl i ailhyfforddi a dod o hyd i lwybrau newydd tuag at gyflogaeth yn sgil y newidiadau yn Tata Steel UK.”

“Mae ein tîm Cyflogadwyedd wrth law i helpu unrhyw unigolion ledled Cymru yr effeithiwyd arnynt, boed yn gyn-weithwyr Tata fel Ryan, yn gontractwyr, neu'n staff y cafodd eu swyddi eu dileu o gwmnïau yng nghadwyn gyflenwi Tata Steel.”

Mae'r cyllid yn rhan o ymrwymiad ehangach i gefnogi unigolion a busnesau yr effeithiwyd arnynt. 

I gael rhagor o wybodaeth am y cymorth sydd ar gael i unigolion a'r cynlluniau cyllido sydd ar gael i gyflenwyr, egin fusnesau, a mentrau sy'n tyfu, ewch i: www.npt.gov.uk/cy/hwb-gwybodaeth-pontio-tata-steel