Datganiad I'r Wasg

Mae'r rhaglen uchelgeisiol, a ddatblygwyd mewn partneriaeth rhwng Cyngor Castell-nedd Port Talbot a Celtic Leisure, yn cynnwys cyfleusterau ffitrwydd newydd, llecynnau llesiant arbenigol, cyrtiau padel, a diweddariadau i gampfeydd.

Mae'r rhaglen fuddsoddi'n adeiladu ar ymrwymiad y cyngor i wella cyfleusterau hamdden, ac ar yr un pryd i gefnogi Celtic Leisure i gynyddu aelodaeth, denu defnyddwyr newydd a gwella iechyd ein cymunedau drwy hynny, a helpu i gynhyrchu incwm ychwanegol y gellir ei ailfuddsoddi yn ei dro i wella gwasanaethau,

Canolfan Hamdden Aberafan

Dylai Canolfan Hamdden Aberafan weld buddsoddiad o £708,000, gyda gwaith ar fin dechrau a dyddiad agor arfaethedig yn ystod yr hydref 2026.

Bydd y prosiect yn cynnwys:  

• Stiwdio Reformer Pilates newydd sbon, i ddarparu cynnig ffitrwydd sydd wedi tyfu'n sylweddol o ran poblogrwydd ledled y DU.

• Estyniad i'r gampfa drwy ailddatblygu rhan o oriel wylio'r neuadd chwaraeon.

• Llecyn llesiant ac adfer newydd.

• Cyflwyno system ffitrwydd EGYM arloesol, gan ddefnyddio technoleg glyfar a rhaglenni wedi'u personoleiddio i gefnogi ymarfer, adferiad a chyflyrau iechyd hirdymor.

Canolfan Hamdden Pontardawe

Gallai Canolfan Hamdden Pontardawe weld trawsnewidiad sylweddol yn digwydd drwy gyfrwng prosiect ailddatblygu arfaethedig sy'n werth £2.1 miliwn.

Ymhlith y cynlluniau mae:

• Campfa newydd sbon wedi'i lleoli ar flaen yr adeilad

• Llecyn stiwdio ffitrwydd ychwanegol

• Campfa hybrid newydd a gynlluniwyd o gwmpas tueddiadau ffitrwydd sydd ar eu prifiant a galwadau gan gwsmeriaid.

Mae'r cynllun yn cael ei gynllunio i gyd-fynd â chynlluniau mwy hirdymor ar gyfer pwll nofio yn yr ardal yn y dyfodol. Er nad yw'r arian i gael pwll nofio newydd wedi'i sicrhau eto, mae'r Cyngor yn ymrwymo £250,000 i symud cynlluniau ymlaen i'r cam nesaf.

Mae'r gwaith yn dangos ymroddiad parhaus y Cyngor i ddarparu cyfleuster nofio modern ar gyfer Cwm Tawe pan fydd cyfleoedd ariannu'n dod i'r fei.

Canolfan Hamdden Castell-nedd

Clustnodwyd Canolfan Hamdden Castell-nedd ar gyfer dau gwrt tenis Padel newydd, gan ddod ag un o'r chwaraeon sy'n cynyddu gyflymaf ym Mhrydain i Gastell-nedd.

Bydd y prosiect yn trawsnewid cyrtiau tenis sy'n cael eu tanddefnyddio ar hyn o bryd, ac, yn ddibynnol ar ganiatâd cynllunio, gallent fod yn barod erbyn y gwanwyn 2027.

Yn ogystal, mae Celtic Leisure yn bwriadu buddsoddi rhyw £150,000 o'i gronfeydd wrth gefn ei hunan i ddiweddaru'r gampfa drwy osod offer newydd a chyfleusterau mwy modern. 

Canolfan Hamdden Cwm Nedd

Mae cynlluniau cynnar hefyd yn cael eu datblygu i ddiweddaru cyfleusterau'r gampfa yng Nghanolfan Hamdden Cwm Nedd yng Nglyn-nedd. Er bod y cynlluniau'n dal i fod yn eu babandod, mae Celtic Leisure wedi cadarnhau'i fwriad i wella'r cyfleuster ar gyfer cwsmeriaid.

Yn ôl y Cynghorydd Cen Phillips, Aelod Cabinet dros Natur, Twristiaeth a Llesiant:

"Mae'r rhaglen fuddsoddi'n dangos ein hymrwymiad i ddarparu cyfleusterau hamdden o ansawdd uchel ar gyfer cymunedau ledled Castell-nedd Port Talbot. O leoliadau ffitrwydd arloesol yn Aberafan i gyfleoedd chwaraeon newydd cyffrous yng Nghastell-nedd a gwelliannau o bwys ym Mhontardawe, bydd y prosiectau hyn yn helpu mwy o bobl i ddod yn heini, gwella eu llesiant, a mwynhau cyfleusterau modern yn agosach at gartref."

Ychwanegodd Jamie Brown, Prif Swyddog Gweithredol, Celtic Leisure:

“Rydyn ni wrth ein bodd o fod yn gweithio gyda Chyngor Castell-nedd Port Talbot ar y rhaglen fuddsoddi uchelgeisiol hon. Bydd y datblygiadau hyn yn trawsnewid y profiad i gwsmeriaid ar draws ein cyfleusterau, gan helpu mwy o bobl i ddod yn heini, gwella eu hiechyd a mwynhau manteision gwasanaethau hamdden modern o ansawdd uchel. Yn bwysig, bydd y buddsoddiad hwn hefyd yn cryfhau cynaliadwyedd hirdymor ein canolfannau, gan ein galluogi i ailfuddsoddi mewn cyfleusterau a gwasanaethau sy'n cefnogi cymunedau iachach ar draws y fwrdeistref sirol."

Disgwylir i'r rhaglen fuddsoddi wella cyfleusterau ar gyfer preswylwyr a thyfu cyfranogiad mewn gweithgaredd corfforol, chwaraeon a gwasanaethau llesiant ar draws Castell-nedd Port Talbot  ar yr un pryd. Rhagwelir y bydd y cynlluniau hefyd yn cynhyrchu incwm ychwanegol sylweddol dros y blynyddoedd i ddod, gan helpu i leihau costau hirdymor gweithredu cyfleusterau hamdden, a chefnogi'u cynaliadwyedd i'r dyfodol.