Datganiad I'r Wasg

Bydd y datblygiad trawiadol newydd yn dod yn lle Ysgol Gynradd Gymraeg Rhosafan a chanolfan hyfforddi Tir Morfa, a fydd yn cael eu dymchwel ar ôl i’r cyfleusterau newydd gael eu cwblhau.

Bydd y prosiect yn darparu amgylchedd dysgu modern ac amgylcheddol gynaliadwy ar gyfer hyd at 511 o ddisgyblion, gan gynnwys darpariaeth feithrin a gofal plant, Uned Anghenion Dysgu Ychwanegol, a lleoedd am ran o’r dydd ar gyfer Uned Drochi Gymraeg (WIU).

Bydd y datblygiad yn cynnwys adeilad ysgol rhannol unllawr, rhannol ddeulawr, ynghyd â maes chwaraeon, ardal chwaraeon amlddefnydd (MUGA), ardaloedd chwarae, gwelliannau i’r briffordd a mynediad, tirlunio helaeth, a gwaith cysylltiol, Bydd yr ysgol newydd yn cynnig lleoliadau o ansawdd uchel ar gyfer dysgu ac addysgu, law yn llaw â gwelliant nodedig i gyfleusterau gan gynnwys caeau chwaraeon a buarthau chwarae modern.

Bydd canolfan hyfforddi Tir Morfa, sy’n darparu gwasanaethau addysg i oedolion, yn cael ei ymgorffori yn y datblygiad newydd nodedig hwn.

Mae’r cynllun uchelgeisiol hwn yn rhan o Raglen Her Ysgolion Cynaliadwy Llywodraeth Cymru, sy’n cefnogi creu ysgolion sy’n amgylcheddol gynaliadwy ac sy’n cynnwys cymunedau lleol, gan gynnwys disgyblion, yn y gwaith o gynllunio, darparu a rheoli’r ysgol.

Mae’r datblygiad yn un o blith dim ond tri phrosiect a ddewiswyd ledled Cymru i weithredu fel glasbrint ar gyfer cynllunio a darparu ysgolion i’r dyfodol.

Mae hefyd yn rhan allweddol o Raglen Strategol Gwella Ysgolion Cyngor Castell-nedd Port Talbot, sydd â’r nod o sicrhau fod gan bob disgybl fynediad i addysg o safon uchel mewn cyfleusterau modern, addas i’w pwrpas.

Dywedodd y Cynghorydd Nia Jenkins, Aelod Cabinet Cyngor Castell-nedd Port Talbot dros Addysg a’r Blynyddoedd Cynnar: “Rydyn ni wrth ein bodd fod y gwaith ar yr ysgol newydd wedi dechrau, ac allwn ni ddim ag aros i weld y datblygiad wedi’i gwblhau.

“Mae’n nodi carreg filltir bwysig yn Rhaglen Strategol y Cyngor i Wella Ysgolion, sy’n canolbwyntio ar sicrhau fod gan bob disgybl fynediad i addysg o safon uchel mewn cyfleusterau modern, addas i’w pwrpas.

“Bydd y datblygiad hefyd yn ymgorffori darpariaeth addysg i oedolion, a chafodd ei gynllunio gyda chynaliadwyedd yn greiddiol iddo. Ein nod yw creu amgylchedd dysgu sy’n cefnogi’r genhedlaeth bresennol a chenedlaethau’r dyfodol.”

Dywedodd Ysgrifennydd y Cabined dros Addysg yn Llywodraeth Cymru, Lynne Neagle: “Dwi wrth fy modd o weld y gwaith yn dechrau ar y datblygiad cyffrous newydd hwn i ddysgwyr a’u teuluoedd ym Mhort Talbot. Bydd y buddsoddiad drwy ein Rhaglen Her Ysgolion Cynaliadwy yn darparu cyfleusterau modern, amgylcheddol gynaliadwy, ac mae’n adlewyrchu ein hymrwymiad i addysg cyfrwng Cymraeg. Diolch i bawb sy’n gweithio i alluogi hyn oll.”