Datganiad I'r Wasg

Mae'r Gronfa Twf Economaidd a Buddsoddi, a weinyddir gan Gyngor Castell-nedd Port Talbot ar ran Llywodraeth y DU a Tata Steel UK, bellach ar agor ar gyfer ceisiadau, gan gynnig grantiau o rhwng £300,001 a £1.5 miliwn i gefnogi ehangu busnesau a chyfleoedd economaidd newydd yn y rhanbarth. 

Mae'r gronfa wedi'i sefydlu i helpu i ysgogi buddsoddiad mewn sectorau sydd â photensial twf cryf, gan gynnwys gweithgynhyrchu uwch, peirianneg, ynni gwyrdd, technolegau digidol a diwydiannau eraill sy'n gysylltiedig â'r economi werdd cynyddol amlwg.

Gall busnesau wneud cais am gyllid i gefnogi prosiectau fel prynu cyfarpar newydd, uwchraddio adeiladau masnachol, buddsoddi mewn technolegau newydd, neu fentrau sy'n galluogi cwmnïau i arallgyfeirio, cynyddu cynhyrchiant a chreu cyflogaeth gwerth uchel.

Mae'r rhaglen yn rhan o'r ymateb economaidd ehangach i gynlluniau datgarboneiddio Tata Steel UK a'i nod yw cefnogi busnesau a all helpu i yrru twf economaidd hirdymor ledled y rhanbarth.

Bydd angen i ymgeiswyr ddangos sut y bydd eu prosiectau yn darparu manteision economaidd clir, gan gynnwys buddsoddiad newydd, creu swyddi, ac arloesi yn eu sector.

Meddai'r Cynghorydd Steve Hunt, Arweinydd Cyngor Castell-nedd Port Talbot: "Mae'r pontio sy'n digwydd yn Tata Steel yn cynrychioli cyfnod arwyddocaol i'n heconomi leol. Mae'r gronfa hon yn rhoi cyfle pwysig i gefnogi busnesau sy'n barod i fuddsoddi, tyfu a chreu swyddi newydd ar draws Castell-nedd Port Talbot a'r rhanbarth ehangach.

"Rydym am annog busnesau uchelgeisiol sydd â chynlluniau twf cadarn i gyflwyno prosiectau a all ddarparu buddion economaidd parhaol, cryfhau ein cadwyni cyflenwi lleol a helpu i adeiladu economi fwy gwydn ar gyfer y dyfodol.

"Mae Cyngor Castell-nedd Port Talbot yn falch o fod yn gweinyddu'r gronfa hon ar ran Llywodraeth y DU a Tata Steel UK, ac edrychwn ymlaen at gefnogi busnesau a all chwarae rhan allweddol ym mhennod nesaf datblygu economaidd yn y rhanbarth." 

Meddai Jo Stevens, Ysgrifennydd Gwladol Cymru: "Mae'r gronfa newydd hon yn enghraifft bwerus o'r hyn y gellir ei gyflawni pan fydd y llywodraeth a busnes yn gweithio gyda'i gilydd i gyflawni ar gyfer cymunedau. Gyda chefnogaeth dros £11.7 miliwn, bydd yn helpu busnesau lleol i dyfu, creu swyddi o ansawdd uchel a denu mwy o fuddsoddiad newydd i Bort Talbot.

"Gweithredodd Llywodraeth y DU yn gadarn i sicrhau y byddai gweithgynhyrchu dur yn parhau ym Mhort Talbot a hefyd i ddarparu cymorth ariannol helaeth i weithwyr dur, busnesau'r gadwyn gyflenwi a'r gymuned ehangach. 

"Hyd yn hyn mae £122 miliwn wedi'i ddyrannu gan Fwrdd Pontio Dur Tata Port Talbot gan arwain at filoedd o grantiau'n cael eu dosbarthu'n lleol ar gyfer prosiectau ailhyfforddi, buddsoddi busnes ac adfywio.

"Fe ddywedon ni y byddem yn cefnogi gweithwyr dur Port Talbot, eu teuluoedd a'r busnesau sy'n dibynnu ar Tata Steel ac rydym wedi cyflawni'r addewid hwnnw." 

Dywedodd Prif Weithredwr Tata Steel UK, Rajesh Nair: “Mae cyfraniad Tata Steel UK i’r Gronfa Twf Economaidd a Buddsoddi newydd yn adlewyrchu ein hymrwymiad parhaus i gefnogi datblygiad hirdymor ardal Port Talbot wrth i ni newid i waith dur gwyrddach. Bydd y gronfa newydd hon yn helpu i annog busnesau i ddod i’r ardal, tyfu, arloesi a chreu swyddi lleol o ansawdd uchel. 

“Rydym yn falch o weithio ochr yn ochr â’n partneriaid ar draws y llywodraeth ac awdurdodau lleol i gryfhau ac amrywio’r economi leol, cefnogi datblygu sgiliau a denu’r buddsoddiad hirdymor fydd yn sicrhau dyfodol cynaliadwy i Bort Talbot a’i chymunedau.”

Mae'r gronfa yn gweithredu trwy broses ymgeisio gystadleuol, gyda phrosiectau'n cael eu hasesu drwy feini prawf gan gynnwys effaith economaidd, gwerth am arian, arloesedd a chyflawnadwyedd.

Bydd gofyn i ymgeiswyr llwyddiannus gyfrannu cyllid cyfatebol a dangos sut y bydd eu prosiect yn cefnogi twf busnes ac yn rhoi buddion economaidd hirdymor i'r rhanbarth.

Anogir busnesau sydd â diddordeb mewn gwneud cais i adolygu'r canllawiau ymgeisio yn ofalus cyn cyflwyno eu cynigion.

Rhaid cyflwyno ceisiadau i Dîm Grantiau Tata Cyngor Castell-nedd Port Talbot.

Mae rhagor o wybodaeth am y Gronfa Twf Economaidd a Buddsoddi, gan gynnwys meini prawf cymhwysedd a chanllawiau ymgeisio, ar gael yn: www.npt.gov.uk/cy/TataEGIF