Cynllun Lliniaru Llifogydd Nant Grandison

Trosolwg

Mae Cynllun Lliniaru Llifogydd Nant Grandison ar y cam achos busnes llawn a dylunio manwl ar hyn o bryd. Mae Cyngor Bwrdeistref Sirol Castell-nedd Port Talbot (CBSCNPT) wedi bod yn gweithio gyda'r ymgynghoriaeth peirianneg, AtkinsRéalis, i ddatblygu'r cynllun hwn. Maent wedi datblygu dull sy'n seiliedig ar grynhoi dŵr gyda'r bwriad o leihau'r risg o lifogydd yn Llansawel.

Mae'r cam dylunio manwl mewn perthynas â Chynllun Lliniaru Llifogydd Nant Grandison wedi cynnwys dadansoddiad helaeth, gan gynnwys arolygon a gwaith archwilio ar draws y dalgylch. Mae hyn wedi arwain at gael opsiwn a ffefrir ar gyfer dyluniad y datblygiad er mwyn paratoi ar gyfer y cam adeiladu.

Mae'r opsiwn a ffefrir yn cynnwys gosod cwlfert newydd gyda gallu draenio gwell. Byddai hyn wedi'i leoli ar hyd y briffordd ac ym mannau gwyrdd agored yn Llansawel.

Yn ogystal, mae'r cynllun yn cynnig adeiladu cwlfert lliniaru llifogydd newydd ynghyd â basn gwanhau dwr storm ym Mharc Jersey. Bydd hyn yn cynyddu gallu hydrolig presennol y system draenio dŵr wyneb. Bydd y cwlfert newydd yn cysylltu â'r cwrs dŵr presennol ymhellach i lawr yr afon cyn gollwng i mewn i Afon Nedd. Bydd y cynllun arfaethedig yn darparu'r gallu i liniaru llifogydd hyd at ac yn cynnwys y Tebygolrwydd Gormodiant Blynyddol o 1% (1 mewn 100).

Yn ystod y cam dylunio manwl, gwnaed arolygon ecolegol er mwyn sicrhau yr ystyriwyd yr holl welliannau ecolegol ac amgylcheddol. Nodwyd bod rhai rhywogaethau estron goresgynnol megis canclwm Japan yn bresennol yn ardaloedd is y dalgylch. Bydd rheoli a thrin rhywogaethau estron goresgynnol yn chwarae rôl hanfodol yn y cynllun lliniaru llifogydd gan gefnogi cadernid ecolegol a gwella'r amgylchedd naturiol.

Mae Parc Jersey hefyd yn adnabyddus am ei dreftadaeth ddiwydiannol, sy'n cynnwys olion system rheilffordd o'r 19eg ganrif. Ystyriwyd yr asesiadau treftadaeth a'r arolygon ecolegol fel rhan o'r opsiwn dyluniad a ffefrir. O ganlyniad i'r cynllun hwn, bydd mannau gwyrdd a threftadaeth leol yn cael eu gwella'n sylweddol. Bydd y gwaith uwchraddio arfaethedig i'r ardal chwarae ym Mharc Jersey hefyd yn gwella'r lleoliad sy'n addas i deuluoedd i'r gymuned leol yn Llansawel.

Disgwylir i gam adeiladu Cynllun Lliniaru Llifogydd Nant Grandison ddechrau yn 2026-27. Rhaid nodi bod cynnydd y cynllun i'r cam adeiladu'n dibynnu'n fawr ar argaeledd cyllid oddi wrth y Cyngor a Llywodraeth Cymru. Ni allwn roi unrhyw amserlenni pendant ar gyfer gwaith yn y dyfodol ar hyn o bryd nac unrhyw sicrwydd y bydd y cynllun hwn yn mynd rhagddo nes y ceir eglurder pellach mewn perthynas â chyllid y Llywodraeth.

Rydym wedi cynnwys dogfennaeth ar gyfer y cais cynllunio drafft ac rydym yn awyddus i chi adolygu a rhoi sylwadau ar y rhain yn ystod y broses Cyn-ymgeisio Statudol a fydd yn dechrau'n ffurfiol ar 14 Mai 2025. Rydym yn eich gwahodd i adolygu'r cynigion a chwblhau ein holiadur ymgynghori. Bydd yr ymgynghoriad yn rhedeg am 28 diwrnod tan 11 Mehefin 2025. Yn dilyn adolygiad o'r sylwadau a dderbyniwyd, rydym yn rhagweld y bydd cais cynllunio ffurfiol yn cael ei wneud yn ddiweddarach eleni.

Cynlluniau

Lawrlwythiadau (Yn Saesneg)

Adroddiadau

Llawrlwythiadau (Yn Saesneg)

Arolwg

Dweud eich dweud