Datganiad I'r Wasg
Yn dilyn Eisteddfod Genedlaethol yr Urdd ym Meifod, mae'r sylw nawr yn troi at ddigwyddiad y flwyddyn nesaf ym Margam
Mae'r erthygl hon yn fwy na 10 mis oed
04 Mehefin 2024
Cymerodd dros 400 o ddisgyblion o ysgolion Castell-nedd Port Talbot ran yn Eisteddfod Genedlaethol yr Urdd 2024 ym Meifod, a ddaeth i ben yr wythnos diwethaf.
Eleni, cafodd Prifwyl yr Urdd, sef un o wyliau ieuenctid mwyaf Ewrop, ei chynnal o 27 Mai tan 1 Mehefin ar dir ger y Trallwng.
Cofrestrodd 100,454 o bobl ifanc, sef y nifer mwyaf erioed, i gystadlu mewn mwy na 400 o gystadlaethau eleni, gan gynnwys mwy o ddysgwyr Cymraeg nag erioed o'r blaen.
O'r holl gantorion, dawnswyr a pherfformwyr eraill medrus o Gastell-nedd Port Talbot, un o'r perfformiadau a wnaeth argraff fawr oedd yr un a gafwyd gan Barti Merched Ysgol Ystalyfera (Uwchradd) a enillodd y wobr GYNTAF yn y categori hwn.
Dywedodd llefarydd ar ran Cyngor Castell-nedd Port Talbot: “Hoffwn longyfarch ein holl gynrychiolwyr a lwyddodd mewn rhagbrofion lleol yn eu niferoedd er mwyn cystadlu er lefel genedlaethol yn yr ŵyl eiconig hon o lenyddiaeth, cerddoriaeth a chelfyddydau perfformio.
“Roedd hefyd yn bleser gweld llawer iawn o gystadleuwyr o Gastell-nedd Port Talbot yn cyrraedd Eisteddfod yr Urdd mewn categorïau i ddysgwyr Cymraeg.
“Yng Nghastell-nedd Port Talbot, rydyn ni nawr yn edrych ymlaen at weld ein disgyblion yn cystadlu yn Eisteddfod yr Urdd Margam 2025, a gaiff ei chynnal rhwng 26 Mai a 31 Mai 2025.”
Ar ddiwedd Eisteddfod yr Urdd eleni, dywedodd Llio Maddocks, Cyfarwyddwr y Celfyddydau, Urdd Gobaith Cymru:“Mae Eisteddfod yr Urdd yn uchafbwynt diwylliannol yn ein calendr yng Nghymru, ac mae gwyliau fel ein Prifwyl ni yn haeddu cael eu mwynhau gan bawb.
“Mae sicrhau cyfleoedd a phrofiadau i gystadleuwyr ac ymwelwyr sy'n siaradwyr Cymraeg newydd yn hollbwysig i lwyddiant a gwaddol ein gŵyl ieuenctid. Edrychwn ymlaen yn hyderus at Eisteddfod yr Urdd Dur a Môr ym Mharc Margam, Castell-nedd Port Talbot yn 2025.”