Datganiad I'r Wasg
Oes gennych chi stori am D-Day, yr Ail Ryfel Byd neu stori filwrol arall?
Mae'r erthygl hon yn fwy na 8 mis oed
28 Mehefin 2024
Yn ystod Wythnos y Lluoedd Arfog eleni, ac yn y flwyddyn sy’n nodi 80-mlwyddiant y Glanio yn Normandi, mae Cyngor Castell-nedd Port Talbot yn chwilio am straeon lleol sy’n mynegi treftadaeth filwrol falch y fwrdeistref sirol.
Mae dathlu a hyrwyddo ein treftadaeth yn thema allweddol yn Strategaeth Dreftadaeth Castell-nedd Port Talbot 2023-2038.
Yn unol â hyn bydd y straeon hyn yn ein helpu i greu arddangosfa newydd a fydd yn agor yn ddiweddarach eleni, gan roi sylw i anturiaethau’r bobl leol a ymladdodd dros eu gwlad neu a fu’n rhan o’r ‘ffrynt gartref’, fel gweithio mewn ffatrïoedd arfau neu weithredu fel wardeiniaid tân.
Er enghraifft, oeddech chi neu unrhyw un o’ch perthnasau’n rhan o’r paratoadau ar gyfer D-Day, oeddech chi’n rhan o’r glanio ei hunan, neu a fuoch chi mewn unrhyw ryfel ers hynny, fel Rhyfel y Falklands?
Rydyn ni’n chwilio am bobl all anfon ffotograffau, cymryd rhan mewn fideos, anfon eu fideos eu hunain, neu siarad â ni am eu straeon a’u hatgofion er mwyn i ni allu cofnodi’r rhain ar gyfer cenedlaethau’r dyfodol.
Er y bydd hyn oll yn rhan o ymdrech barhaus i gasglu a rhannu gwybodaeth er mwyn dathlu ein cymuned Lluoedd Arfog ddoe a heddiw, bydd y set gyntaf o straeon yn cael ei rhannu yn ystod Gŵyl Lluoedd Arfog Maer Castell-nedd Port Talbot ar ddiwedd mis Hydref.
Os hoffech gael mwy o wybodaeth, neu os oes gennych chi stori i’w rhannu, anfonwch e-bost at armedforces@npt.gov.uk neu ffoniwch 07870 979336.