Datganiad I'r Wasg

Roedd Ymgyrch Walt yn cynnwys ymgyrch “pryniant prawf” ar y cyd gan y cyngor a phartneriaid yn Heddlu De Cymru lle y cafodd hysbyseb ei chyhoeddi ar Facebook yn galw am gludwyr gwastraff trwyddedig i roi dyfynbris am symud gwastraff o ardal Lon Las. 

Yn ogystal â chynnal ymweliadau rhagweithiol â chyflenwyr adeiladwyr yn y fwrdeistref sirol er mwyn eu hysbysu ynghylch eu dyletswyddau cyfreithiol, gwnaeth swyddogion hefyd adael taflenni cyngor a manylion cyswllt er mwyn iddynt eu dosbarthu i'w cwsmeriaid ac unrhyw berchnogion tai a oedd yn dymuno cwyno am waith adeiladu yn eu cartrefi.

Cafodd y rhai a ymatebodd i'r hysbyseb ar 16 Hydref 2024, nad oeddent i'w gweld ar gronfa ddata cludwyr gwastraff Cyfoeth Naturiol Cymru/Asiantaeth yr Amgylchedd, eu gwahodd i gasglu'r gwastraff a metel sgrap ar amser penodedig.

Cyrhaeddodd dau gludydd gwastraff, a chafodd un ei stopio yn ei gerbyd yn Sidings Terrace, Sgiwen, ar ôl mynd â'r gwastraff o Lon Las yn ei gerbyd. Ar ôl ei stopio, dywedodd yr heddlu wrth y cludydd y dylai roi gwybod i'r DVLA mai ef yw perchennog newydd y cerbyd. 

Pan gafodd ei holi pam oedd gwefan CNC yn dangos nad oedd ganddo Drwydded Cludo Gwastraff gyfredol, honnodd y cludydd ei fod newydd adnewyddu ei Drwydded Cludo Gwastraff gan awgrymu ‘efallai nad yw wedi'i diweddaru’. 

Cafodd y cludydd ei atgoffa y byddai gwiriadau pellach yn cael eu cynnal ac y gallai wynebu Hysbysiad Cosb Benodedig o £300 pe bai'n dod i'r amlwg ei fod heb adnewyddu ei drwydded mewn gwirionedd. Mae gwiriadau â CNC wedi cadarnhau nad oedd wedi gwneud cais i adnewyddu ei drwydded, ac mae bellach wedi cael Hysbysiad Cosb Benodedig o £300.

Gwnaeth yr heddlu ddarganfod bod yr ail gludydd a ymatebodd wedi'i wahardd rhag gyrru.

Cafodd ei gerbyd ei atafaelu ac mae'n bosibl y bydd y mater yn mynd gerbron llys. Mae gwiriadau â CNC wedi cadarnhau nad oedd ganddo drwydded i gludo gwastraff, a rhoddwyd Hysbysiad Cosb Benodedig o £300 iddo.

Dywedodd y Cyngh. Scott Jones, sef Aelod Cabinet Cyngor Castell-nedd Port Talbot dros Strydlun: “Mae'r ymgyrch amlasiantaeth hon yn dangos bod y cyngor a'i bartneriaid yn benderfynol o sicrhau y caiff cyfiawnder ei weinyddu i unrhyw un sy'n andwyo'r amgylchedd yn ein cymunedau drwy gludo gwastraff heb y drwydded briodol ac yna ei ollwng, a'i losgi weithiau.”

Cafodd Ymgyrch Walt ei chynnal fel rhan o Wythnos Masnachwyr Twyllodrus, pan wnaeth swyddogion Cyngor Castell-nedd Port Talbot hefyd ymweld â chyflenwyr adeiladwyr lleol i roi cyngor ar wastraff a safonau masnach, a threuliodd Swyddogion Gorfodi Gwastraff ddiwrnod gyda Heddlu De Cymru yn stopio cerbydau masnachol er mwyn cynnal gwiriadau ar drwyddedau cludo gwastraff.