Datganiad I'r Wasg
Yr olwyn yn troi at atyniad mawr iawn ar Lan Môr Aberafan!
26 Chwefror 2025
Mae Cyngor Castell-nedd Port Talbot wedi dod i gytundeb gyda’r cwmni ffeiriau hir-sefydledig Studts Events Ltd i ddod â reid ‘olwyn fawr’ 118 troedfedd o uchder anhygoel i Lan Môr Aberafan yn nes ymlaen eleni.
Yn ddibynnol ar gael caniatâd cynllunio, bydd y reid, o’r enw Yr Olwyn Fawr ar Lan Môr Aberafan, yn gweithredu dros fisoedd yr haf hyd at 2027. Law yn llaw â’r olwyn fawr, cynhelir hefyd gyfres o ffeiriau hwyl ar lan y môr a weithredir gan yr un cwmni, eto yn ystod misoedd yr haf hyd at 2027.
Yn ôl Sean Smith, Cyfarwyddwr Gweithrediadau gyda Studts Events: “Fel cwmni teuluol lleol, rydyn ni’n ddiolchgar iawn ac yn llawn cyffro o gael y cyfle hwn i ddod ag atyniad anhygoel arall i Lan Môr Aberafan, law yn llaw â’n ffeiriau hwyl.”
Bydd agoriad mawr yr olwyn fawr yn digwydd dros y misoedd nesaf hyn.
Dywedodd y Cynghorydd Cen Phillips, Aelod Cabinet Cyngor Castell-nedd Port Talbot dros Natur, Twristiaeth a Llesiant: “Bydd y cytundeb hwn, os bydd yn cael cymeradwyaeth gan y pwyllgor cynllunio, yn darparu atyniadau ychwanegol ar Lan Môr Aberafan i breswylwyr lleol ac ymwelwyr, sy’n gyson â’r uchelgais a amlinellwyd yn Uwch-gynllun Glan Môr Aberafan y Cyngor, a’r Cynllun Rheoli Cyrchfan.”
Bydd modd i’r rhai sy’n reidio ar Olwyn Fawr Aberafan fwynhau golygfeydd ysgubol ar draws Môr Hafren a Bae Abertawe. Lleolir yr olwyn fawr a’r ffeiriau ar safle ar lan y môr ger y toiledau cyhoeddus a chyferbyn â Chanolfan Hamdden a Ffitrwydd Aberafan.