Datganiad I'r Wasg

Bydd y digwyddiad hwn, a gaiff ei gynnal yn lleoliad godidog Parc Gwledig Margam, yn cynnig cyfle unigryw i fwynhau ymarfer corff iachusol yn un o'r parciau gwledig mwyaf hanesyddol a hardd yn y DU.

Dim ond ychydig ddiwrnodau sydd ar ôl i gofrestru, a nifer cyfyngedig o leoedd sydd ar gael, felly peidiwch â cholli eich cyfle i fod yn rhan o'r digwyddiad cyffrous hwn – a noddir yn garedig gan Trade Centre Wales.

Gall rhedwyr ddewis rhwng llwybrau tir cymysg 10k a 5k gan helpu i godi arian i Gronfa Gyffredinol Podiatreg Treforys a Chronfa Nyrsys Ardal CNPT, sy'n rhan o Elusen Iechyd Bae Abertawe.

Gyda chastell trawiadol, ceirw'n crwydro'n rhydd a golygfeydd ysblennydd, mae Parc Margam ym Mhort Talbot eisoes yn annwyl iawn i lawer o bobl. Adlewyrchwyd hyn yn ddiweddar pan gafodd Parc Margam ei gydnabod yng ngwobrau mawreddog People's Choice am yr 11eg flwyddyn yn olynol.

Mae Ras 10k Margam, a gynhelir ar 1,000 erw o barcdir gogoneddus, yn cynnig digwyddiad heb ei debyg, harddwch naturiol, hanes, bywyd gwyllt ac amrywiaeth eang o weithgareddau llawn hwyl i deuluoedd a gwylwyr, sy'n ei wneud yn un o'r diwrnodau allan gorau yng Nghymru.

Cofrestrwch yma heddiw http://www.margamcountrypark.co.uk/10k

i gael bod yn rhan o'r digwyddiad cyffrous hwn! Y dyddiad cau ar gyfer cofrestru yw hanner dydd, ddydd Gwener 14 Mawrth.

Dywedodd Maer Castell-nedd Port Talbot eleni, y Cyngh. Matthew Crowley: “Mae hwn yn gyfle gwych i'n trigolion lleol a phobl o bell fwynhau her gorfforol a golygfeydd sy'n ddigon i fynd â'ch gwynt.

“Ar yr un pryd, gallant helpu i godi arian i'r elusennau rwyf wedi'u henwebu eleni – dau achos teilwng iawn sy'n darparu gwasanaethau hanfodol.”

Ychwanegodd Cadeirydd a Sylfaenydd Trade Centre wales, Mark Bailey: “Fel cwmni a chyflogwr lleol blaenllaw, mae Trade Centre Wales yn falch o fod yn rhan o'r gymuned leol ac mae'n bleser gennym gefnogi Ras 10k a 5k Parc Margam unwaith eto.

“Edrychwn ymlaen at gwrdd â rhedwyr o bob rhan o dde Cymru ar 16 Mawrth a diolch iddynt ymlaen llaw am helpu elusennau'r Maer.”

Y prif fanylion:

• Cofrestru o 9am ymlaen yng Nghastell Margam

• Bydd y rasys 10k a 5k yn dechrau am 10am

• Noder: mae'r llwybr yn un tir cymysg sy'n cynnwys llwybrau coetir a llethrau. Mae'n gallu mynd yn fwdlyd mewn tywydd gwlyb!

• Parcio am ddim i bobl sy'n cymryd rhan. Bydd y prif faes parcio a'r ddesg gofrestru ar agor o 9:00am ymlaen. Bydd y rasys 10k a 5k yn dechrau am 10:00

• Rhaid bod yn 14 oed neu'n hŷn ar ddiwrnod y digwyddiad i gymryd rhan

• Bydd pob rhedwr yn cael medal 10k Parc Margam 2025 ar y llinell derfyn!

Mae Cronfa Gyffredinol Podiatreg Treforys yn rhoi hyfforddiant er mwyn sicrhau bod gan staff y wybodaeth orau a mwyaf cyfredol am ffyrdd o ddiwallu anghenion cleifion, ynghyd â thechnoleg, peiriannau ac arloesedd wedi'u huwchraddio.

Mae Cronfa Gyffredinol Nyrsys Ardal Castell-nedd Port Talbot yn cynnwys y Clinig Clwyfau yng Nghanolfan Adnoddau Castell-nedd Port Talbot. Mae’r gronfa'n galluogi cyfleoedd ym myd addysg er mwyn helpu staff i ddatblygu a gwella profiad cleifion yn ogystal ag archwilio offer arbenigol er mwyn helpu'r clinig i roi'r gofal gorau posibl.