Sut rydym yn prosesu ac yn talu eich hawliad

Byddwn yn anfon llythyr penderfyniad budd-dal atoch drwy’r post neu drwy e-bost pan fydd eich hawliad wedi’i benderfynu. 

Mae faint y byddwch yn ei gael yn dibynnu ar:

• incwm eich aelwyd, gan gynnwys budd-daliadau a phensiynau
• cynilion a buddsoddiadau dros £6,000 ar gyfer pobl o oedran gweithio, a thros £10,000 ar gyfer pobl sy’n ddigon oed i gael Pensiwn y Wladwriaeth
• eich amgylchiadau, er enghraifft oedran y bobl yn y cartref, neu os oes gan rywun anabledd

Os ydych yn denant y cyngor neu gymdeithas dai, mae faint y byddwch yn ei gael hefyd yn dibynnu ar:

• eich rhent cymwys, sef yr uchafswm o rent y gall eich Budd-dal Tai ei gwmpasu. Gall hyn fod yn llai na’ch rhent gwirioneddol ac ni all gwmpasu taliadau gwasanaeth, megis cyfraddau dŵr
• nifer yr ystafelloedd gwely sbâr sydd gennych os ydych o dan oedran pensiwn

Os ydych yn rhentu gan landlord preifat, mae faint y byddwch yn ei gael yn dibynnu ar Lwfans Tai Lleol. Gall swm y Lwfans Tai Lleol fod yn is na’ch rhent gwirioneddol.

Tenantiaid cymdeithasau tai

Fel arfer, byddwn yn talu eich budd-dal yn uniongyrchol i’ch landlord bob pedair wythnos, mewn ôl-ddyledion.

Os ydych wedi gofyn i ni wneud hynny, gallwn dalu eich budd-dal yn uniongyrchol i’ch cyfrif banc bob pythefnos, mewn ôl-ddyledion. Mae hyn yn golygu’r pythefnos sydd newydd fynd heibio.

Tenantiaid preifat

Os ydych yn denant preifat, byddwn yn talu Budd-dal Tai yn uniongyrchol i’ch cyfrif banc bob pythefnos, mewn ôl-ddyledion. Efallai y bydd y dyddiad rydym yn eich talu yn wahanol i’r dyddiad y mae eich rhent yn ddyledus. 

Eich cyfrifoldeb chi yw rheoli eich cyllid a thalu eich landlord.

Taliadau’n uniongyrchol i landlordiaid

Weithiau byddwn yn talu eich budd-dal yn uniongyrchol i’r landlord.  

Mae enghreifftiau o pryd y byddwn yn gwneud hyn yn cynnwys os ydych:

• mwy nag wyth wythnos ar ei hôl hi gyda’ch rhent 
• wedi bod neu’n cael problemau talu’ch rhent